4 տարի առաջ հայկական հեռուստատեսության շարքը համալրեց «Տավուշ» հեռուստաընկերությունը՝ Տավուշ աշխարհի տեղեկատվական, ճանաչողական, ուսուցողական, խորհրդատվական, հետաքննական, կանաչ, սահմանապահ մեդիան։ Ավելի քան 5 տարի Տավուշը չուներ իր հեռուստաալիքը, իսկ 2020 թվականի ապրիլի 15-ին վերագործարկվեց ու եթեր վերդարձավ Տավուշի մարզային հեռուստաընկերությունը՝ իր առջև խնդիր դնելով մարդկանց իրազեկել անվտանգային, կրթական ու մշակութային, տնտեսության, սոցիալական ոլորտների, մարզային ու համայնքային խնդիրների, երիտասարդների, կանանց, հաշմանդամների, քաղաքների ու գյուղերի կյանքի , Տավուշում ընթացող ու սպասվելիք ծրագրերի մասին:

Մեր գործունեության յուրահատկությունն ու մեծ տարբերությունը մյուսներից՝ աղետների ռիսկի կառավարման, կլիմայի փոփոխության և հարմարվողականության ու կայուն զարգացման ծրագրերի ներկայացումն է, քաղպաշտպանական, անվտանգության և դիմակայունության թեմաներ, հաղորդումներ, ֆիլմեր, հոլովակներ, Արտակարգ ալիքի չհնացող հաղորդումները, միջազգային առաջավոր փորձը: Նշանաբանն է՝ ով իրազեկված է, նա պաշտպանված է: Ընդհանուր խորագիրն է՝ Տավուշը՝ անվտանգության գոտի:

2022 թվականի տարեսկզբին Տավուշի մարզի սահմանամերձ բնակավայրերում ապրող պատանի-երիտասարդ լրագրողների համար «Արտակարգ Ալիք» տեղեկատվական հասարակական կազմակերպությունը և Տավուշ Մեդիան հայտարարեցին մրցույթ: Տավուշի մարզի սահմանամերձ շրջանների 15-30 տարեկան պատանիներին ու երիտասարդներին տրվեց բացառիկ հնարավորություն` սեփական բնակավայրում իրականացնել լրագրողական աշխատանք՝ ներկայացնելով Տավուշի գյուղերն ու մարդկանց։

Հաղթողները ստացան մրցանակային ամբողջ փաթեթը` 4 նկարահանող տեսախցիկ, 4 մոնտաժային համակարգիչ, (կից պարագաներ՝ բարձրախոսներ, կրիչներ, եռոտանիներ), համապատասխան ուսուցում՝ Տավուշ Մեդիայի գրասենյակում և սեփական բնակավայրից համագործակցելու ու վարձատրվելու հնարավորություն։
Այս ընթացքում (2022-2024) երիտասարդ թղթակիցներն ավելի քան 150 տեսանյութ են պատրաստել։

2022 թվականին ձևավորվեց «Կանաչ և դիմակայուն Տավուշ» կոալիցիան։ «Արտակարգ Ալիք» տեղեկատվական հասարակական կազմակերպությունը և Տավուշ Մեդիան իրենց համագործակցությունը և տեղեկատվական խողովակներն առաջարկեցին Տավուշի մարզում գործող գործընկեր-հասարարական կազմակերպություններին՝ ի նպաստ մարզում տեղական ժողովրդավարության ամրապնդման ու քաղաքացիական բարձր ինքնագիտակցություն ունեցող և համայնքային կյանքում ակտիվ դերակատարում ունեցող քաղաքացիների ձևավորման։

Տավուշ ՀԸ հիմնադրման 2-րդ տարեդարձի կապակցությամբ՝ 2022 թվականին գործընկեր կառույցները ստորագրեցին «Կանաչ ու Դիմակայուն Տավուշ» կոալիցիային միանալու հուշագիրը` հիմք դնելով համագործակցության նոր ոլորտների: (Կոալիցիայի շրջանակում պատրաստվել են գործընկերներին ներկայացնող 100-ից ավելի հեռուստահաղորդումներ):

Տավուշ հեռուստաընկերությունն առաջինն է իրազեկում ու տեղեկացնում իր հեռուստադիտողներին տեղական վերջին ու թարմ նորությունների մասին: Ունենալով հեռուստադիողների ու հետևորդների վստահությունը՝ մենք շարունակելու ենք պատասխանատու կերպով տրամադրել ճշգրիտ ու ամբողջական տեղեկատվություն` հավատարիմ մնալով հաշվետու, թափանցիկ և վստահելի լինելու մեր սկզբունքներին: (Շուրջ 450 ռեպորտաժ 4 տարվա ընթացքում)

Պետական, մասնավոր, միջազգային ու հասարակական կազմակերպությունների ցուցաբերած տարաբնույթ աջակցությունները, որոնք բնակչության խոցելի խմբերի համար են նախատեսված, Տավուշ Մեդիան դրանք հավաքագրել և ներկայացրել է հանրությանը՝ նրանց աշխատանքը դարձնելով առավել արդյունավետ ու թիրախային։
Նախագծի շրջանակում ստեղծված «Զրույցներ հոգեբանի հետ» շարքը ևս մեկ քայլով բարձրացրել է բնակչության բարոյահոգեբանական դիմակայունությունը։

Քառամյա գործունեության ընթացքում ընդունելով դպրոցականների և ուսանողների, նրանց ծանոթացրել ենք հեռուստատեսային աշխատանքին ու խոսելով մեդիայի և մեդիագրագիտության մասին։ Այս ընթացքում նաև Տավուշ Մեդիայի լրագրողներն են այցելել Տավուշի համայնքներ՝ անցկացնելով մեդիագրագիտության բարձրացմանն ուղղված դասընթացներ։ Մեր ստուդիայում հաճախ իրականացվում են նաև վերապատրաստումներ՝ անվտանգության վարքականոնների, փաստերի ստուգման, հետաքննական լրագրության թեմաներով։

Տավուշ հեռուստաընկերությունը շարունակում է պատրաստել ու ներկայացնել հայտնի ու սիրված հաղորդաշարերը՝ «Մեր բարբառն ու բարքերը», «Տղերքը» «Քննարկում Տավուշ ՀԸ եթերում», «Մակարդակով կոֆե», «Տավուշեցիները», «Աշխարհի ծայրերից», «Տավուշյան էսքիսզներ», «Հեքիաթներ տավուշյան բարբառով», «Տավուշի համը», «Խոսք ու զրույցը», «Տավուշոտ պոեզիան», որոնց ավելացավ նաև «Քո իրավունքը»։

Հեռուստահաղորդումներից զատ՝ Տավուշ TV-ի եթերը մերթընդմերթ ընդմիջվում և զարդարվում էր արվեստի գործերի ներկայացմամբ։ Մշակութային ժառանգության հանրահռչակման նպատակով մեր եթերում էլ ավելի հաճախ ցուցադրվում են ժողովրդական արվեստի գործերը՝ «կենդանացած», նոր շնչով ու խոսքով։ «Տարվա հոբելյաններ» շարքը նույնպես միտված է մշակութային հարուստ ժառանգության ջատագովմանը՝ հուշում-հիշեցում՝ ովքեր են մեր մեծերը:

Ձեզ հետ միասին մենք շարունակելու ենք արարել ու ստեղծել ամենատավուշյան, բազմազան ու որակյալ բովանդակությամբ, սիրով ու Տավուշի ինքնատիպ ջերմությամբ լեցուն, արժանահավատ, արժանապատիվ, պատասխանատու հեռուստահաղորդումները Ձեզ հետ, ձեր մասին, ձեր խնդիրների ու հոգսերի մասին, ձեր գործի, հաջողությունների, դժվարությունների, նախաձեռնությունների ու երազանքների մասին: Ու այսօր, արդեն 4 տարեկան Տավուշ հեռուստաընկերությունը տավուշեցու ընկերն է, բարին կամեցողը, օգնության ձեռք մեկնողը, ցավն ու տխրությունն ապրումակցողը, ուրախություն կիսողն ու հնարավորություն ընձեռողը։

Ինչի մասին էլ, որ պատմենք, ինչ աշխատանքներ էլ որ լինեն, դրանց ամբողջությամբ կարող եք ծանոթանալ Տավուշ Մեդիայի կայքում՝ www.tavushmedia.am, յութուբյան ալիքում և սոցիալական ցանցերում:
Կարճ ժամանակահատվածում Տավուշ ՀԸ իր ներկայությունն ապահովվեց սոցիալական հարթակներում (Ֆեյսբուք, Յութուբ, Ինստագրամ ու ՏիկՏոկ) և այսօր էլ օր-օրի ընդլայնում է իր հետևորդների թիվն ու աշխարհագրական ընդգրկումը։

Մենք ձեզ համար ենք աշխատում, ու մեզ համար չափազանց կարևոր է ձեր կարծիքը, և հենց այս տոնական օրերին հաճույքով կլսենք ձեր դիտողություն-դիտարկումները, առաջարկ-քննարկումները, ինչու չէ, նաև՝ ցանկություններն ու բարեմաղթանքները: